監察西九文化區小組委員會噚日開會，民記同建制派委員一早坐定定，準備夾手夾腳投票，搶奪委員會主席一職。最終民記成功力推黨友Tree根上位，擊敗公民黨袋巾出任委員會主席一職，輸咗嘅傑哥自動當選委員會副主席。
建制派恃住人多勢眾，噚日開會時都零舍輕鬆。唔單止身兼西九管理局董事嘅體育、演藝、文化及出版界馬逢國遲大到，喺委員會投完晒票、會議結束前5分鐘先抵埗；會議中段先到議事廳投票嘅地產及建造界議員石禮謙，噚日更輕鬆到喺會上剪手指甲，令人巧京京。
八方唔排除石議員今次舉動，係出於留住同事開會嘅一片苦心，皆因石議員事發時坐喺議事廳走廊位置，邊個議員咁唔識死、開會時行出行入，隨時被石議員剪到「啪啪」聲嘅指甲彈中，咁仲唔夠阻嚇力？