【家人痛心】
膽大包天要求男友策劃「劫獄」的女被告本為乖乖女，但在2011年中二暑假與陳拍拖後便無心向學，愛情大過天的她因拍拖問題常與父母爭吵，終離家出走。女被告母親昨向記者怒斥陳教壞女兒，陳竟曾叫女兒用螺絲批解開窗花，讓他可偷偷從地下爬上女兒房間不被家人發現，「佢仲試過孭住我個女爬窗落街」。
據悉，女被告中一時就讀精英班，成績中上，但與陳拍拖後便無心向學，「科科肥佬」，成績跌至包尾，因長期曠課，被學校勒令退學。女被告父親則大嘆「個女以前好乖，成日陪阿媽買餸、做家務，自從識咗佢（陳）就性格大變」，直言：「我好痛恨佢（陳）。」又大數陳「𠱁我個女做嘢賺錢畀佢交租。佢咁嘅樣，我個女點會同佢一齊？」
睇電視劇以為劫獄可行
辯方求情時亦多次強調女被告反叛、幼稚，愛情至上，不懂父母的關心，但犯案後父母不離不棄支持她，令雙方關係大改進。女被告更親撰求情信，自責天真愚昧，稱因睇得多電視劇、愛情小說，以為劫獄方法可行，故隨口向男友說，男友竟信以為真劫獄，她已深感後悔。女被告家人更向房署申請調遷，讓她遠離不良朋友，希望女兒能重過新生活。
《蘋果》記者