「打波先嚟落雨，唔通連個天都唔鍾意我？」即使天不下雨，康文署轄下的足球場常常爆滿，租場隨時難過買奶粉，有人因此找到商機，踢波踢上樓，觀塘工廈短短數個月內便有兩間室內小型足球公司進駐。
iSoccer及Master 5（M5）都由現役港甲球員夾錢做老闆。iSoccer有效力南區的陳銘剛，M5則有流浪的黃展鴻。由球場鬥到上工廈，他們異口同聲說工廈足球場遍地黃金，生命滿希望，前路由我創。記者: 譚淑美 攝影：胡堅
走入鏽味極重的觀塘工廠區，僅一個街口之隔，隱藏了兩個室內小型足球場，M5開張個多星期，記者訪問當天，太極樂隊的鄧建明（Joey）及港腳文彼得亦到場支持。Joey披着一頭散髮守龍門，他說：「簡直喜出望外！呢度有正式訓練，又唔怕落雨，香港足球有救！」文彼得說：「幾好吖，有新鮮感。出面嘅球場用真草，呢度用仿真草。真草比較滑，仿真草較安全。」
iSoccer去年10月開張，是工廈足球的開山祖師，難得東主陳銘剛不介意「多隻香爐多隻鬼」，「我哋好開心有競爭，證明市場有需求」。他甚至建議雙方合作，一旦場地爆滿，便把客人互相轉介，聽落很有「體育精神」。
記者問M5是否抄橋，老闆黃展鴻嘆道：「咁難答嘅？」將個波交給拍檔、退役球員朱偉霖，他強調數年前已有這念頭。對於iSoccer建議互相轉介顧客，黃認為有得諗，「都可以傾吓，但現時我哋嘅場地未爆」。
M5共有十個股東，六個是現役或退役球員，開張前已扮客人潛入敵方陣地收料；至於陳銘剛這邊股東有八人，有醫生、會計師等。大堆頭集資，每人平均只需拿出10多萬元。
樓底高矮拼個你死我活
M5以面積取勝，擁有兩個五人足球場，還提供健身室、肌肉訓練班、瑜伽班，甚至容許客人召開宗教佈道大會，像一道fusion菜，而且非常窩心，朱偉霖尷尬地說：「女更衣室有非常體貼的用品提供，（衞生巾？）係呀，哈哈哈……」對家iSoccer獨沽一味搞足球，只有一個球場。
就連樓底高矮也可鬥個你死我活，記者在場所見，兩個場地樓高不過三米左右，倘若身高逾兩米的英格蘭中鋒高治（Peter Crouch）到場頂頭鎚，肯定撞正橫樑。這方面iSoccer較佔優，陳銘剛自言開業前視察過60、70個場地，也看過M5現址，但認為樓底較矮，所以沒有租用，暗踢對家一腳：「我哋嘅樓底較對方高20、30厘米，不要看少這差距，空間感很重要。」對手黃展鴻連忙解畫：「五人球場以地波為主，我哋樓底太矮，若足球觸及上面圍網，就當成出界。」
開訓練班球星做生招牌
市場營銷理論有謂Product Line Extension（產品線延伸），海洋公園賣精品及餐飲，可佔盈利四成。球場除租場費外，亦可售賣衍生商品，賺取更多鈔票。iSoccer及M5都有專給小朋友的足球訓練班，由球星教練做生招牌。
兩公司都有飲品、足球衣物售賣，也有圍板圍封球場。圍板除了防止玻璃窗被踢爆，最重要是吸納廣告。陳銘剛說：「有人提議不如賣魚蛋、賣啤酒……但賣酒，恐怕有人鬧事。」記者提醒，開熟食檔及賣酒都要申請牌照。陳銘剛瞪大眼睛，顯然沒有想過這問題。
足球員生涯從來不易捱，黃展鴻是2009年東亞運港隊金牌功臣之一，但過後為了生計一度轉行做裝修，現時返回球壇，擔任流浪的隊長。他的足球夢未死，並希望在工廈令夢想成真，「足球員的事業很短暫，但我想繼續在足球業發展，憑經驗及知識，教人踢波」，30歲的他說。