西九視覺文化博物館M+要等到2017年，想去睇藝術展都唔係冇地方，位於金鐘正義道嘅亞洲協會中心藝術館將於本周四起一連兩個月，舉辦「設計裡外：生活．未來」現代藝術設計展，全部作品都係來自港產12位設計師，免費入場。
呢次展覽嘅12位大師，為人熟悉包括林偉而、羅啟妍、伍韶勁、羅偉基等。呢次藝術展唔單止有室內，連室外都有展品，而室內展品都用咗好多投射、燈光效果。
對竹棚甚有研究嘅建築師林偉而，繼設計西九大戲棚後，今次喺藝術館外面嘅天橋，用數百支紅色嘅竹搭咗一個名為「竹報平安」嘅巨型竹門，相當有氣勢。主辦單位話，呢個竹製涼亭係今個蛇年嘅作品，寓意團圓、和諧及可持續發展。呢次展覽策展嘅總監係東京森美術館館長南條史生，佢擁有超過20年嘅策展經驗。