足總盃上演「莊家大屠殺」後，相信善忘嘅波友好快又會投入周中英超連場快車好戲；投注上，小弟先撐冇乜人會理嘅倫敦二線打吡，近期不斷增兵圖強嘅「槌仔幫」，格食格作客受讓𡁻富咸；另外，「兵工廠」阿仙奴近年走低，漸成強對強嘅下風一隊，不過對紅軍例外，希望借足總盃晉級嘅旺氣，做到喺主場成就3殺利記。
唔止英超戲碼勁，今晚更有西班牙國家打吡；但韋斯咸下盤屬全晚首選，對賽格食格，韋斯咸鬥「另一咸」近10戰取6勝3和1負，還有受讓平/半咁筍主要喺韋斯咸近況也頹；但領隊大Sam近日密密增援補兵源不足，剛喺預備組上陣入波嘅巴西前鋒威靈頓包列斯達隨時候命，中路防守都剛補入新兵，止跌決心明顯。重要係免踢上周末足總盃下，中場命脈路蘭、麥克盧保同進步大嘅迪亞美都可唞足，應付今場中下游大戰，進取者可兼博冷W。
對手富咸今季主場威力盡失，小弟試過推介也中伏，12月起5戰主場只曾恰到當時殘兵嘅紐記，班費不足下重點暫只借到阿仙奴小將費林邦頂檔，前線拜仁雷斯同貝碧托夫同類型冇乜火花；最弊中場不論傳送及攔截力唔足，仲靠快36歲嘅加拉高尼斯走嚟走去，剛好蝕章畀韋斯咸最強中場掃蕩嗰瓣，點讓得起呀？希望韋咸早啲入波，咪令大家心掛掛欣賞其他大戰。
另一倫敦球會阿仙奴，走低係不爭事實，見愛華頓同熱刺近日添兵唔手軟，前者爭第4下風咯；但賭波場場計，佢哋近兩戰聯賽碰巧作客俱贏利記，喺𠵱家班波境況唔容易做到；但對手領隊羅渣士啱啱見史杜列治加盟，又有契仔波連尼復出，躍躍欲試4-3-3，但點都唔及練咗半季、3大主力基奧特，禾仔同普多斯基強攻唔守嘅兵工廠；上周紅軍敗走甲組奧咸，中前場用真力喺雨戰輸得幾甘，阿仙奴出番華美倫呢位熟晒蘇亞雷斯路嘅前阿積士拍檔，上盤最多輸半格！
西盃演國家打吡，講軍容，巴塞佔優，但打首回合未必去盡求贏，呢場我同牽牛唱反調，撐一向有戰意乜都唔怕嘅皇馬，出冷爭番口氣！（下次見報日期：2/2）