CY出口術話可能考慮開徵空置稅，竟然益到視后鄧萃雯？「九姑娘」最近沽出碧海藍天一個中層單位，賬面勁賺接近400萬，呢啲係咪漣漪效應呢？
800萬摩出 創屋苑新高
故事係咁嘅，CY份施政報告冇料到，幫唔到市民上車，樓價繼續升，市民開始歸咎發展商揸住啲貨唔賣，係都要善價而沽，CY隨即放風話可能考慮開徵空置稅。咁邊個發展商揸住最多貨尾，講到明要善價而沽呢？咪就係CY金主恒隆地產（101）主席陳啟宗囉。
恒隆咪即刻做嘢，象徵式攞咗長沙灣碧海藍天十個貨尾出來賣，呎價一律萬萬聲。最貴嗰間係有海景嘅2座48樓H室，建築面積784方呎，盛惠954.5萬元，呎價成萬二蚊。既然地產商都高價散貨，業主梗係唔執輸。
視后鄧萃雯07年用423萬買入同一座、中層向海單位，好似話自住，可能見市道實在太好，據聞雯女啱啱以800萬沽咗呢件貨。即係話揸五年幾，賬面賺377萬，建築面積呎價1.02萬，實用呎價1.36萬，唔計頂層複式，呢個價錢破晒碧海藍天紀錄，成為最貴標準單位造價。CY應該都估唔到，講一句說話令到視后賺大錢！
李華華
mailto:[email protected]
新game出爐 ～ 快啲試下自己有無辦法上車啦！
【「樓」年運程小測試】
http://www.tomonews.net/game/hkhousingpolicy/