好多人開工前都要隊番杯咖啡，保安局局長黎棟國就需要一杯回魂茶。噚日唔使開行會嘅黎棟國，印印腳喺政府總部餐廳嘆早餐，揸住杯奶茶同新聞處處長黃偉綸打牙骹。原來黎棟國日隊至少一杯奶茶，對奶茶仲頗有研究，佢話睇過一啲報告，發現奶茶嘅咖啡因含量仲高過咖啡；若然要提神，港式奶茶就好work。至於台式奶茶，佢就麻麻嘞，嫌太甜喎！八方同時聽聞，政府日內公佈多兩個政治助理，民建聯出身嘅商務及經濟發展局局長蘇錦樑搵番民記觀塘區議會陳百里幫手，另一政助就去財經事務及庫務局幫儍強局長。