熊狼互噬，噬到香港滿城花生碎；芸芸花生友中，肯定包括唐唐啦！唐唐家臣林大輝噚日話呀，早前都同唐唐傾過呢單嘢，引述唐唐呢排瞓覺瞓得不知幾開心，仲話尖啤若有猛料，唔該盡快爆啦，費時影響社會安定，怪唔得呢排啲花生，就嚟賣到斷市咁滯啦。
有料快爆 維持社會穩定
自言近排心情勁靚、連瞓覺都識笑，兼且成日夢到動物園，入面有獅子老虎同熊嘅大輝話，尖啤爆料後，有同唐唐通電、通WhatsApp交流交流，引述唐唐認同佢嘅觀點，就係尖啤有乜料喺手，就應該快啲爆出嚟，以免影響社會安定。
大輝同時覺得，尖啤若然放流料，狼英應該告尖啤誹謗，還自己清白囉。據佢話，唐唐聽到只係報以哈哈大笑，仲形容唐唐「𠵱家瞓覺瞓得好開心」，所以多啲留喺香港瞓覺喎。
話時話，大輝日前睇無綫神劇《天與地》，咁啱睇到林保怡參選立法會時候話，自私嘅人都係顧咗私利、然後再顧市民利益，形容此說算係「人在旅途灑淚時」嘅寫照，已經決定遲吓立法會春茗時，當面清唱《人在旅途灑淚時》畀狼英聽喎。睇嚟啲花生價，有排升囉。
mailto:[email protected]