美聯集團（1200）主席黃建業同恒地（012）主席李兆基一樣，唔叫人買樓，反而叫大家買股票。
黃老闆噚日喺公司周年晚宴上，指本港樓市有剛性需求，未來一年都唔會跌，不過如果有好多錢、好多樓，不妨沽樓換股。
黃建業話，因為股票低水，最好換入藍籌股，例如內房股同內銀股，佢話自己已經身體力行，但就點都唔肯透露掃咗乜嘢貨。
香港地產建設商會執委會主席梁志堅當然有捧黃老闆場，佢乘機又狂呻，埋怨政府喺開徵BSD呢件事上面，「根本就傾都冇得傾」，不過佢哋就會繼續爭取，商會日內會將新嘅建議書修訂本交畀政府，CY又要接招了。
除咗梁志堅，「樓神」林達民同楊受成等都有出席，現場所見衣香鬢影，每位賓客都悉心打扮，令人目不暇給。