孫柏文今日又先來認屎認屁。三個禮拜前，即1月8日，我強烈建議大家「一注獨贏沽日圓」。當日，只要用87日圓就買到一美元，噚日落筆一刻，已經要90.5日圓。趁機，今日重申目標價，第一站見148日圓。
至於日本政府在唔減開支、又唔夠稅收的情況下，個差額又因為日本人口結構老化冇新儲蓄去買，得央行狂印鈔以「量化寬鬆、促進經濟」嘅掩護下買。上個禮拜二，我話過買樓要諗日本，令我對上嗰七日收到好多有興趣fan屎嘅電郵。
變身零食霸權
日本大把樓租金回報高，例如北海道有廿厘，東京周街七、八、九厘，而銀行聽聞開始放錢出去，呢個成本借一厘，回報高嘅情況將會被套戥走。
即係每年10萬蚊租回報，你100萬元買，就10厘回報。
你掟幾個香港人過去，例如我以前電台拍檔火燎森，畀佢哋可以借到盡啲錢？100萬元炒高五倍都仲得，因為500萬元買都仲有兩厘，扣成本利息，每年袋五萬蚊。
買到一棟，20個單位，咁就袋100萬元；最新消息話日本銀行肯借日圓畀「公司」買樓，下星期繼續講。
今日，要叫大家一注獨贏CEC國際（759）。佢哋以前做電子線圈，不過近兩年幾前開始轉戰零售，賣零食叫「759阿信屋」。
做零售，要講有幾大，因為零售核心係要代表消費者向供應商議價，佢哋已係「零食霸權」，上周上佢嘅觀塘旗艦店，外國啤酒平過其他霸權店。毛利率增長喺下半年開始，利潤應開始升。噚日收0.63元，四億幾市值，一年內見1.3元，升超過一倍。
孫柏文
獨立股評人
本欄逢周二刊出
http://facebook.com/shuen