朱茵去年10月中為黃貫中（Paul）生咗個女，生完佢一直坐月冇見過人，直到噚日佢喺澳門以神秘嘉賓身份同古天樂、袁詠儀（靚靚）出席喜來登金沙城中心酒店活動，大家先見到佢已經收晒身。
「個女中文名叫黃鶯」
朱茵話：「生仔前重咗成20磅，一生完就唔見咗17磅，真係瘦得好快，個女中文名叫黃鶯係我改嘅、英文名Debbie係阿Paul改嘅，鶯係有智慧之鳥，所以我取呢個名，英文名就因為有位外國女歌手叫Debbie，阿Paul好欣賞，所以個女就改埋同一個名。」
𠵱家佢兩公婆有女萬事足，乜嘢都係以個女為大，朱茵話：「個女出生時重6磅10安士，當佢出生時聽到佢把叫聲，我同老公都忍唔住喊，每日望住個女就覺得好滿足。𠵱家一腳踢湊女，阿Paul都有幫手，不過我就冇餵人奶，怕壓力大 。」朱茵話以後接工作會睇影唔影響湊女，而阿Paul就會更努力搵奶粉錢。
古仔噚日聽到老友應采兒（叮叮）有喜，都為佢開心，佢話：「早排叮叮打畀我，問我有冇時間食飯，話佢準備生BB，諗唔到咁快就有咗。」靚靚噚日先喺巴黎度假回港，問佢會唔會再追多個小朋友？佢話 ：「風水師話今年唔適合，加上今年好忙，應該唔會啦！」
撰文：馮仁昭