呢個世界就係咁，有事鍾無艷，冇事夏迎春，踢爆狼英涉賄選嘅Dream Bear，家下紅透半邊天，恍如鬆弛熊咁受歡迎，大家先知佢係寶，希望佢繼續大踢爆。噚日佢本來現身城大討論施政報告論壇，點知突然缺席，令唔少人慕「尖啤」之名而來嘅人好失望。失去了，方知尖啤可貴。
長毛執死雞成焦點
搞論壇嘅城大學生話，尖啤噚日早上以生病為由甩底，搞到個論壇陣容跌晒watt。尖啤本來係論壇上唯一挺梁嘅大旗手（如今變咗倒梁悍將），所以冇咗佢之後，論壇只餘泛民同建制派謝偉俊。台下記者眼見尖啤甩底，只餘小貓三、四隻。
講者之一嘅公民黨毛孟靜都呻笨，話當日尖啤去佢個街頭論壇品評時政，對方問佢攞個電郵方便聯絡，毛孟靜竟然推卻：「我早知就畀佢啦，可能佢會選擇向我爆料。」冇咗尖啤，長毛就「執死雞」成為全場焦點，長毛話希望患上政治病嘅尖啤早日康復。
泛民呻笨，狼營就顧住抹黑尖啤，劃清界線。噚晚一個酒會上，梁營嘅中華出入口商會會長莊成鑫就批評尖啤說話不盡不實，相信港人會識分析。禮義廉黨員黃定光就話尖啤嘅跳國金論係狗急跳牆，但求語不驚人誓不休，若狼英委任咗劉夢熊做行會成員，就真係大劑。
港人大譚惠珠就叫公開呼籲尖啤「保重身體，唔好再講咁多嘢。」呢班人喺尖啤去年高調挺梁時，又唔見佢哋咁樣講。政治，原來真係好醜陋。
mailto:[email protected]