正所謂願賭服輸，如果投資者自己睇錯市，最多當機立斷止蝕，怨得邊個？但去到好似私募基金TPG咁輸打贏要，讓李寧 （2331）用超大折讓價3.5元發行CS（可換股證券），仲自己有份包銷40%，實在很難令人不質疑，此舉是為了方便TPG低吸CS、溝淡早年高價買入的CB（可換股債券）罷了。
TPG是在舊年1月認購李寧5.6億人仔的CB，5年期，行使價7.74元（當時李寧股價是6.72元），嗰陣人人都話李寧見底，覺得TPG做過盡職審查後仍肯落叠，一定係離最壞情況不遠。誰知後來李寧不是「見底」，而是「露底」，存貨積壓同經營不善嘅問題較想象中嚴重，股價最低跌到3.6元。作為私募基金，投資回報最後做唔到以倍數計，睇怕難以交差。如果要李寧見返14蚊水平，就當俾20倍PE佢，即要由𠵱家蝕錢，四年內改善業績，變返年賺7億以上。咁你話難唔難？
芬佬形容，TPG呢鋪擺明老貓燒鬚買貴貨，然後出招玩供CS，換股價只係佢筆CB的45%，小股東唔想被大舉攤薄就唯有供，唔玩落去就益人執平貨。TPG貪心到冇朋友。
海迪