呢個星期四中午時間，將軍澳堆填區一定好熱鬧，事關港交所（388）喺將軍澳嘅數據中心正式舉行開幕禮，CY到時做主禮嘉賓，全城都想佢正面回應Dream Bear事件，可以預期到時財經同政治記者都會一齊湧入堆填區，一齊感受吓呢度幾咁令人心曠神怡。
李小加要拆招
除咗CY，作為主人家，港交所主席周松崗、CEO李小加，仲有一班董事都會出席，財經事務及庫務局同證監會就未知邊位會到，不過局長陳家強同證監主席唐家成都可能唔想阻頭阻勢，阻住CY笑住唔答記者問題呢？
加上有人爆料，指港交所畀定樣辦意見書班經紀簽名撐期指夜市，雖然一早知道李小加「班馬」，但搞到咁明顯似乎就有啲難睇，即管睇吓李小加到時點拆招。