【牛腩篇】咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
要成為豪門嘅領隊，除咗要有一定名氣、往績及領軍功力外，對賓尼迪斯嚟講，或者係夠面皮厚；賓帥不管在車路士的任期有多長，起碼再度回歸英超後，執多幾百萬鎊，問世間邊有領隊有佢咁好運。
小弟一直對賓尼迪斯嘅印象麻麻，04年領華倫西亞打破巴塞隆拿同皇家馬德里壟斷，贏取西甲冠軍，多少受惠兩支班霸內訌，當然佢都打起一大班西班牙本土兵，好似巴拉查、艾比達、安古路等，憑住西甲冠軍教練呢個銜頭，仲可以轉戰英超帶利物浦。
賓帥帶利物浦贏過歐聯，係有交代；但最令人反感係佢大玩mind game，特別同曼聯領隊費格遜挑起罵戰，但搞死嘅卻又係自己隊波。帶國際米蘭極速被炒，賓帥已經開始見底，不過都呃咗過千萬鎊賠償；滿以為佢時來運到，趁迪馬堤奧離隊，成為車仔暫代領隊，以車仔班底，保前3、贏世冠盃、英聯盃，同喺英足盃晉級，實屬份內事，不過賓帥一次又一次孭鑊，𠵱家連英足盃都差啲出局。
不過賓尼迪斯值得一讚嘅地方，就係繼續面皮厚，亦係香港打工仔好應該學嘅地方；佢賽前已經打定底，講車仔𠵱家嘅陣容唔強，不過英國報紙即時幫佢計數，車仔𠵱家班底已經花費近3億鎊，咁都唔強仲可以點？到阿巴心儀嘅哥迪奧拿落實來季任拜仁教練，賓帥亦都想趁火打劫，講明希望轉任車仔長期領隊，真係當阿巴儍仔。文：牽牛