財經新聞先天缺憾係悶，所以當電影股有新聞就特別鍾意報。相信電影公司都睇穿呢點，近年特別勤力出通告，直頭當披露易係免費傳宣平台，博見報。
以黃百鳴打骰嘅天馬娛樂（8039）為例，噚晚新鮮滾熱辣發通告，講明將投資1940萬元開拍3D科幻災難片，仲借頭借路暗示套戲將用世界知名大導，係邊個就唔知，等你估估吓，挑起你對套戲嘅好奇心，變相宣傳。
其實天馬都唔係第一次出呢招，上年10月公佈創業板上市時，表示「變相打包」某藝人上市，搞到全城發散人去八邊粒星咁巴閉。今日由娛圈到財金界，都知黃百鳴簽咗古天樂9部戲。
至於星爺嘅比高（8220），「宣傳」來得更直接，前年發自願通告話你聽會開拍《西遊記》；上年11月更發佈一則題為「《西遊．降魔篇》首次電影發佈會」嘅通告，內容99%係形容新戲點勁，只係最後包一句「預計為本集團在電影娛樂業務方面帶來收入」，就當係幫通告加添財經元素。
Fifi
本欄逢周二、四刊出