近排港B奶粉荒，令中港矛盾激化。旅發局主席田北俊噚日同傳媒飯局，大呻旅發局一方面要吸引旅客來港，一方面要顧及港人感受，夾喺中間左右做人難，好似佢哋原本贊成一簽多行，係想方便旅客，點知變咗方便水貨客。
熟悉局內工作
有指田少做咗六年主席，係時候換人，熱門繼任人唔係梁粉而係唐唐老友林建岳。對於呢個人選，田少大讚適合。佢話Peter（岳少洋名）已經係旅發局董事局成員，好熟悉呢方面嘅工作。
至於田少任內自豪嘅「政績」之一，可能包括啱啱改咗喺灣仔會展舉行嘅除夕煙花，全球有成千幾個電視台直播或轉播，其中BBC仲直播咗幾分鐘㖭；往年ifc外牆嘅倒數煙花得五百幾個電視台播咋。今年除夕煙花點搞，就要搵到贊助先再講。