美股強勢畢呈，逐步向歷史高位進發，A股亦不甘示弱，噚日一支大陽燭，再破近期高位，港股雖見19個月高位，但始終予人乏力之感。唐牛主觀意願希望，大戶只係想將冇實力嘅散戶震走，然後再推個市上去。
近排同經紀傾開，發現佢哋嘅客都係舊年12月甚至今年初至重投股海，完全冇享受過9至11月，由QE3炮製嘅升浪，又一次證明普遍散戶係後知後覺嘅一群。唔好講QE3，金管局喺10月底已經開始接錢，傳媒報道亦鋪天蓋地，如果戰友再遇到呢啲情況，就應該知道點做。
既然短期後市欠明朗，不妨從圖表走勢發掘股份。寶光實業（084）早前公佈截至去年底第三季業績，營業額增長8%至9.72億元，消息刺激股價單日炒上一成，經過多日整固，造旗已接近尾聲，隨時落鑊再炒，連續兩日即市跌穿10日線，均能收於其上，具喘穩意思。現價2.65元買入，一旦資金再追捧，重見上月高位2.96元難度不大。
唐牛