【石澳】小便𡃁模Naomi（馮鎵瀠）去年底甩拖，孤獨過生日，不過佢日前自爆有「實業家」追求，前日Naomi去冧仔，佢哋人約黃昏後拖埋隻大狗去石澳沙灘約會，Naomi仲喺facebook打卡，自爆跟阮文韜一齊。
放狗拋波
Naomi嘅四眼新歡阮文韜大有來頭，佢喺英國劍橋建築系畢業，𠵱家喺理大設計學院任教，佢不時出席有關設計嘅活動，非常活躍，仍然單身嘅阮文韜當然係筍盤，醒目Naomi立即mark實。
阮文韜前日下午帶住愛犬同Naomi去石澳嘆下午茶，食飽就去咗沙灘放狗，佢哋先鋪咗蓆，然後坐低邊聽海浪聲邊談心，不時又同狗仔玩拋波，現場所見，阮文韜全程冧狗多過冧女。
採訪、攝影：黃曉程、朱志聰
