你食大三元？我食番鋪大四喜！基斯坦奴朗拿度（C朗）喺星期日西甲早場大演帽子戲法，帶領皇家馬德里大勝基達菲4:0。貴為4屆世足先生得主又點會畀你攞晒彩，仲要入多你一粒；巴塞喺之後夜場以5:1主場大破奧沙辛拿，美斯個人包辦4球，食出大四喜兼突破西甲累積入球200大關，亦成為歷來首個可連續11場西甲入球嘅球員。
最年輕達西甲200球
C朗喺贏基達菲場波連中三元，佢喺職業生涯所有比賽嘅總入球數字突破300大關；不過佢嘅風頭喺短短幾個鐘頭之後，就俾美斯搶晒。巴塞主場對奧沙辛拿，美斯喺11分鐘就先開紀錄，雖然客軍喺24分鐘扳平，但冇耐之後有阿利巴斯領紅兼輸12碼之後，巴塞就展開大屠殺。極刑由美斯操刀射入，加上柏度洛迪古斯喺半場前又入一粒，巴塞喺上半場已經領先至3:1；下半場美斯繼續發威，再入兩球幫巴塞完成大捷。
美斯繼續喺西甲射手榜領放，半季多啲已經入咗33球，領先次席C朗嘅21球，而佢亦以25歲217日成為歷來最年輕嘅球員可以到達西甲200球里程碑，今場波入4球之後已經累積到202球。目前西甲歷來最多入球紀錄係251球，以美斯嘅走勢，隨時下季就搞得掂。
準備周三西盃強戰皇馬
皇馬同巴塞由周三嘅西班牙盃首回合4強起，到3月頭嘅西甲聯賽，喺個零月裏面就會3度交鋒。巴塞助教佐迪洛拉就話美斯今場波咁醒神，唔係向C朗示威：「唔知美斯會唔會係俾C朗喺早場入3球，刺激到踢得咁好，但我唔認為佢仲要去做任何嘢去證明自己實力。」
美斯今季咁「弗」，真係勒都勒唔住；𠵱家除咗皇馬同馬體會之外，其餘17支西甲球隊，全隊嘅總入球都多唔過美斯一個入嘅33球。仲有，原來之前曾經有兩次試過C朗同美斯喺同一日裏面各自都入至少3球，今次係佢哋連續第3季都出現同日「隔空開火」（見附表）。
