我一直以來都是李碧華小姐的忠實讀者，寫作題材意念手法對我影響極深，我其實應該稱呼她為老師才對。上周她的《蘋果》專欄以「夢遺」為題就夠啜核抵死，大快人心！
究竟因何緣故本來狼情熊意好夢正酣竟突然「夢」醒？「鞭鞭有力」點只夢「遺」咁簡單？話狼狠無良心過橋抽板，倒不如怪自己癡人說夢未瞓醒。好歹是個男人，吃了虧就當上了一課交學費就算啦，跑出來扮受害人成個怨婦咁真係乜架都丟清，以後點出來見人？
整件事當然永遠不會如此片面又簡單的，分贓不勻被搵了笨所以要出聲只是幌子，內裏肯定大有文章。受賄有罪行賄一樣有罪，引人犯罪理應罪加一等。明知講出來越描越黑自己亦脫不了身。又不是入世未深的黃毛小子，跑慣江湖搵慣食，損人三百自損三千咁蠢，齋為啖氣？咪玩啦，講出來都冇人信，無論如何一定另有目的。大家買定花生放長雙眼等睇戲，保證好戲連場高潮迭起！
處世做人，離不開個「真」字。其實只要擺明車馬，雖則道不同不相為謀，我絕不介意和真小人交個朋友，但絕對不能容忍偽君子。朋友可以選擇，但在職場碰頭共事交手的，我們都不能更無權選擇，但之所以要轉工，極少純為工作與職位職能未必有關，絕大部份是因為「人事」問題，做得不開心而走，其實不應該亦不值得。一樣米養百樣人，要先「知人」然後才可「善用」，最緊要在公能夠合作把事情辦妥，在私做不做得成朋友完全毋須勉強。路遙知馬力日久見人心，機關如何算盡人算不如天算，記緊要腳踏實地以真誠待人，光明磊落對得住天地良心，食得又瞓得安樂，就好。
張慧敏
http://www.facebook.com/HKcareerdoctor