廠商會會長施榮懷噚日出席香港中華出入口商會31屆會董就職禮時，一見到教育局常任秘書長謝凌潔貞即刻搭晒膊頭打招呼。原來施會長同常秘十分老死，皆因二人不時jam歌，但佢哋唔興唱林峯或者林欣彤，而係唱粵曲，會長仲笑言自己唱開女角用嘅子喉㖭。
男人老狗唱子喉？阿施話自己絕對唔係向高難度挑戰，之不過去到內地做生意應酬，都要唱番兩嘴；大家爭住唱平喉，佢惟有唱女聲囉。阿施仲向八方教路，話唱之前飲兩啖白蘭地就唱到喎。八方記得，已故樂壇巨星羅文喺錄音或登台前，都先飲一杯白蘭地，話可以唱得投入，唔知施會長係咪向籮記偷橋呢？