高盛CEO布蘭克費恩（Lloyd Blankfein）舊年袋走1.6億人工，風騷就一定㗎喇，原來仲高興到轉look，留咗一臉鬍渣，睇落同聯儲局主席伯南克有幾分相似，網民仲手多多幫佢呢個新形象惡搞一番。
放假＝留鬚 留鬚＝放假？
布蘭克費恩周日出席達沃斯世界經濟論壇，公開呢個新形象，迅間成為華爾街話題，事關華爾街男人一向唔興留鬚，留鬚畀人嘅感覺唔係咁整潔，修剪亦需時，鋸扒時嘅肉碎或者雪茄煙灰，好容易黏住啲鬚，對於分秒必爭嘅華爾街人來講，實在太麻煩。
有留鬚嘅華爾街名人通常都係學者派，好似克魯明同施蒂格利茨咁。
布蘭克費恩留鬚引起華爾街咁大反應，佢就好正經咁回應，指留鬚係唔想返工嘅象徵，「我每次放假都會留鬚，所以就係度諗，如果我繼續留鬚，假期係唔係就可以延長呢？」
之不過，麥玲玲師傅話過，從相學上來講，留鬚可以增加權力運，男人30歲後，可以因應面型留鬚。照咁講，中國同西方人對於留鬚嘅概念真係好唔同，中國人想威啲，西方人就想hea啲，定還是布蘭克費恩心想一套，口講一套呢？一年袋近2億銀喎，邊捨得咁快退休呀？
李華華
mailto:[email protected]