年宵市場下周一開鑼，唔少政黨都陸續準備好年宵產品開檔吸金兼做文宣。八方早前寫過，公民黨年宵大賣喺鞋底印上CY字樣嘅「人人落力踩CY」人字拖。呢隻product嘅銷情，會唔會好過禮義廉個「蛇齋餅糭」新春福袋，真係要睇過先知。
面對激烈競爭，公民黨喺開檔前夕，得到近期人氣急升嘅《陽光時務週刊》拔刀相助，贊助佢哋個年宵攤檔。
市民只要幫襯佢哋買一對「人人落力」人字拖，就可以獲贈過往期數嘅《陽光時務週刊》一本。佢哋上星期獨家訪Dream bear，大爆狼英喺僭建醜聞講大話之後，洛陽紙貴，仲未買到嘅朋友，不妨去維園41號檔支持吓。
除咗公民黨，支聯會今年嘅年宵攤位，會賣華叔嘅「我愛大家」揮春、劉曉波同劉霞肖像白瓷杯、「六四」24周年紀念T恤同「平反六四．越走越近」T恤。