【咖喱篇】咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
呢排成日都講啲前列分子，今日轉吓口味，講吓護級嘅阿士東維拉。早幾年維拉都可以叫做爭歐洲賽資格嘅黑馬，但近兩年開始跌watt，今季喺林拔帶領下，除咗深陷護級危機，英足盃同英聯盃仲俾低組別球隊踢出局。
上季林拔教諾域治嗰陣都唔覺，原來佢咁鍾意用年輕人；今季清走晒古拿、占士哥連斯呢啲後防老大哥，棄用埋基雲同戴倫賓特，重用一班年輕球員。喺𠵱家林拔用開班正選入面，係得艾邦拉荷、尼索比亞、施亞蘭奇勒同安祖斯韋文上季打過主力，其他位置就真係面目全非。成隊波一季變動咁多，想好成績都難！
除咗球員，維拉嘅戰術都成日變，今季用過好多陣式，喺舊年12月仲無啦啦由4後衞改打3中堅。維拉暫時有6場聯賽打3中堅，結果呢6場加埋失咗18球。由於英國球員細個冇咩接受過3中堅嘅戰術教育，所以強如曼城喺季初用過一陣都放棄。喺英超入面，暫時只得韋根敢用3中堅，但佢哋領隊馬天尼斯都花咗好多心機去一步步改造，仲搵咗班西班牙同拉丁美洲球員做骨幹。林拔上任半季，就用班英格蘭青年軍改打3中堅，唔防守穿窿就奇。根據統計，維拉上季聯賽場均失1.35球，但今季23場失44球，場均失球上升至1.91球。
阿仙奴領隊雲格講過，用年輕球員就要預佢哋交吓學費，但我擔心林拔呢筆學費太貴，最後搞到維拉降埋班，自己又冇埋份工。文：咖喱