大市陰陽怪氣，指數應跌唔跌，個股相繼洗倉。上周五推介嘅置富（778）逆市造好，證明高息股抗跌力強，今日再推介另一隻高息股信佳（912）。
信佳過去10年均有派息，單計今年中期息7仙，息率已達3.4厘，假設全年派息與去年相同，則現價息率達8.4厘，防守力一流。集團剛宣佈以1.7億銀出售深圳廠房，扣除於東莞建廠開支，約有8,000萬銀落袋，手頭淨現金將增至1.8億銀，相當於市值33%，財務更見穩健，話唔定會派特別息。事實上，集團將生產基地由深圳轉至勞工成本較低嘅東莞，對未來盈利肯定有幫助。
信佳主打電子產品、模具及塑膠產銷業務，截至去年9月底，半年盈利4,953萬銀，按年增長3.1%，現價年度化PE僅5.6倍，平得可憐。集團產品主要出口美國，隨着當地經濟持續復蘇，下半年生意勢必更旺，PE只會更低；現價2.03元買入，中線博見3字頭，潛在升幅48%，屆時息率仲有5.6厘。
唐牛