除咗物業、現金同包包外，手錶係最容易反映一個人嘅財富，亦最易攞嚟晒命，佩戴一百幾十萬一隻手錶絕對係身份象徵。不過內地最近嚴厲反貪，中共總書記習近平上星期先講，要堅定不移懲治腐敗，堅持老虎、蒼蠅一起打，唔知會唔會影響貴錶銷情呢？
中央經濟智囊、清華大學經濟管理學院教授李稻葵，噚日出席一個論壇時就講出一個現象，指內地官員𠵱家唔敢俾人睇到佢哋戴嘅係日本錶定瑞士錶，如果係瑞士名錶，咁就係超出官員嘅工資水平，肯定有人走來調查佢哋有冇涉嫌貪腐。
其實工作上搵到錢，買隻貴錶獎勵自己無可厚非，最緊要啱身份同啱用，唔一定要金錶、鑽錶，新地（016）大股東郭炳江同亞洲金融（662）總裁陳智思咪就係鍾情Timex膠錶囉。