年關將至，又要準備辦年貨，九龍倉（004）今年有新搞作，喺系內鑽石山荷里活廣場搞咗個為期三日嘅小型年宵市場，邀請參與咗「學校起動」計劃嘅11間中學開檔，等一班學生試吓創業滋味。
今次活動召集人之一會德豐（020）常務董事黃光耀（Ricky），噚日喺活動閉幕之前去探班，仲專登走去由九倉同會德豐贊助嘅五育中學檔口幫手做生招牌。
個檔口賣一批由學生製作嘅塑膠揮春，有唔同大細，幫襯嘅可以用求籤方式睇吓中到邊款塑膠揮春，有埋籤文指點來年運程，50蚊抽三次。Ricky除咗影低一張「到此一遊」照，仲即場喺荷包攞出一張紅衫魚支持學生，請在場10位記者求籤。不過話明50蚊抽三次，計落好似唔多啱數喎，定係學生都識做賣大包？