講開金管局，同佢個名差少少嘅金發局，帶來嘅爭議有排未平息，令大家幾乎忘記仲有個經濟發展委員會。呢個委員會同樣由CY揸旗，聲稱帶領轄下四個工作小組，制訂全面經濟發展策略同產業政策。
晶門科技（2878）董事總經理梁廣偉係當中嘅「製造、高新科技及文化創意產業工作小組」成員，QQ之父馬化騰亦係其中一員。
華華早排遇見梁博士，問佢呢個小組究竟搞邊科，點知梁博士都係一頭霧水，劈頭回應「唔知做乜住」，暫時一個會都未開過，未知做啲乜，幾咁坦白！不過佢就好肯定咁同CY劃清界線，「絕對唔係梁振英搵我，雖然大家都姓梁。」家陣風頭火勢，撇清關係都好嘅。
梁博士本身都係公職多籮籮，包括香港電子業商會副主席、香港半導體行業協會副會長等等，真係周身唔得閒。