每年年宵都會有唔少學生擺檔創業淘金，一班皇仁仔有見上次學校搞年宵經已係廿年前，決定今年去維園小試牛刀。主力籌備嘅中五學生李浩賢話，用咗唔使兩萬蚊投到133號心水檔位，跟住喺學校以50蚊一股集資，好快就籌到4萬蚊喇，加上有學校注資，又有做開生意嘅舊生帶佢哋北上入貨，起步唔錯。
平時讀書咁辛苦，佢哋改咗個檔名做「蛇皇檔」開心吓，賣自己設計嘅杯同衞衣，價錢未定。
李同學話，賺錢唔係主要目的，不過始終係同學仔夾錢，到時唔會蛇王。好在皇仁勝在人多勢眾，已經叫咗近百人輪流睇檔，唔睇得都嗌得，現正邀請知名校友捧場。