蕭若元嘅香港人網因成日鬧中共，結果得罪大陸，搞到佢個仔蕭定一冇得投資合拍片，原本阿一同大陸公司合資開拍甄子丹演出嘅3D片《冰封俠》，有傳中方唔多like蕭若元，所以阿一俾人踢出局。
唔會收斂言論
噚日蕭若元喺太古城搞新書簽名會，佢直認：「可以咁講，不過我同阿一生意分開，佢暫時冇得投資合拍大製作，咪拍《一路向西》囉！」蕭若元話阿一都有詐型，不過佢唔會因為咁收斂言論，因自己係死不悔改嘅人，蕭若元連自己個仔都窒：「咁咪好囉！得閒可以陪多啲個女。」
好關心政治嘅蕭若元，對於劉夢熊同特首梁振英單是非，佢話：「如果做朋友去到好機密合作，就要防對手係乜人，等於兩個人瞓埋一張床傾偈，好難證實，我願意出錢請美國犯罪專家同買測謊機，仲要現場直播，睇劉夢熊有冇車大炮，相信中共政府都想知。任何關係都好，分手唔好唱對方，咁會變成互唱。83年我同白姐姐分手，佢唱足我4年，我從來冇回口。」
不過，佢批呢單是非最後都會不了了知。
撰文：馮仁昭
