一篇訪問引爆中環友落街撲雜誌潮，前日Dream Bear話要同狼英齊齊測謊，過唔到關願意「一死以謝天下」。一下子將花生指數推至高峯，而狼英左右護法只剩下「蔣元秋」。
「蔣元秋」為「吳得掂」護航，大喝「使唔使炒咗佢」而成名，但只演活獅吼功，遠不及戲中的元秋型！局長原是幫老闆解決問題，但未見貢獻仲要搞到上司出來撲火。商業社會，請人之道向來要好似炒股咁識得止蝕，何況納稅人請局長嚟做事，唔係請局長嚟學嘢！
老闆應承話加人工但又話唔記得咗，敢問元秋姐係咪會以「結婚紀念日論」來死忍。蔣家二小姐從政，扮師奶冇問題，但只識喺立會用「你收聲」、「你廢話」等小學雞語言，實在令人火滾！
伸張正義都要睇抵唔抵幫，盲目博出位，扮唔到元秋，變咗《食神》「情與義，值千金」得鋪傻勁的火雞姐，一旦狼英腳痛先行一步，到時再話自己當年「好天真好傻」，只會換來──唔抵可憐！
Samantha
本欄逢周一、三、五刊出