之前東錦賽已經夠晒「古靈精怪東南亞」，不過今屆非國盃嘅「古怪」程度絕不遜色，上周六D組尾場阿爾及利亞對多哥，連漫畫《足球小將》破龍門框嘅橋段都出埋；搞到比賽一度暫停，補時接近15分鐘，不過多哥仍然頹勢下以2:0勝出，保住出線希望。
阿國兵大力拉冧
上周六舉行兩場D組比賽，喺羅斯頓堡嘅皇家班佛肯足球場上演，呢個球場喺2010世界盃都有進行比賽，表面睇硬件真係一流，點知南非都可能興「豆腐渣」，一撞就散；話說阿爾及利亞對多哥踢到大約83分鐘，多哥已憑艾迪巴約上半場入球領先緊，阿軍急起直追，效力諾定咸森林嘅中場古迪奧拿殺入禁區，煞唔切掣衝過白線，諗住拉住龍門網借力收慢。點知連個門框都拉歪埋，球證要暫停比賽，工作人員入場移番正個門框，足足搞咗10幾分鐘先搞掂，球證亦都補咗成15分鐘時。
不過補時再多對阿爾及利亞都冇用，多哥憑後備前鋒達美斯補時兩分鐘再入一球，以2:0勝出，打開小組勝利之門。不過有睇直播都知，阿爾及利亞全場圍攻多哥，多哥全場射門次數一隻手都數得晒，不過難得把握力好，最慘都係阿爾及利亞，分組賽兩場都贏形勢輸波，結果兩戰輸晒提早出局。
大象晉級杜奧巴坐冷板
同日早場就正氣好多，冠軍大熱科特迪瓦面對突尼西亞，大象先由謝雲奴先開紀錄，下半場尾段，再憑耶耶托尼同耶高蘭各建一功，以3:0大勝，兩戰兩勝率先晉級；戰果正路，不過都有異象， 一直係科特迪瓦當然主力嘅杜奧巴，竟然只列後備，唔通為年輕化鋪路？