【本報訊】市建局觀塘裕民坊重建項目，收樓程序進入最後階段，大部份住戶已撤離，但同仁街新隆大廈仍餘下兩戶拒遷。這兩戶居於觀塘30多年的老街坊指樓市瘋狂，賠償金未能追上樓價，新居未有着落；雖然6月搬遷限期逼近，仍繼續爭取政府曾說過的「樓換樓」安排。
賠償追不上樓價
市建局在2007年3月重建觀塘市中心，已收回98%住宅物業。謝女士和陳太住所業權去年6月2日復歸政府，於今年中拆卸。這個農曆年，是她們在裕民坊度過的最後一個新年，面對遷拆，完全沒有過年的喜悅。
從前過年，裕民坊一帶店舖總是人山人海，擠滿辦年貨的市民，如今卻冷冷清清。謝女士欷歔說：「嗰陣周圍好熱鬧，交通又方便，幾好住，𠵱家啲街坊都搬走晒。」住對面屋的陳太搭嘴說：「細細個就喺觀塘大，睇住地鐵站起同埋通車，𠵱家要搬，賠償又追唔上不斷上升嘅樓價，都唔知點算。」
50多歲的謝女士任職家務助理，30多年前和家人購入單位，現時獨居：「就嚟退休，只係想搵個地方住，唔係要賺政府錢，政府當初應承賠償金額足夠買番同區七年樓，根本冇可能。」
其單位實用面積360呎，市建局08年提出以220萬收購，「當時一心諗住有機會樓換樓，所以唔接受，𠵱家佢話賠350萬，但係啲樓價係咁升，同區25年樓樓價都已經升到300幾萬」。
促政府兌現承諾
26年樓齡的居屋寶珮苑寶珊閣，實用面積405呎的單位，補地價後賣340萬元，「賠償都未必夠畀裝修、律師費，更加冇可能買到新啲嘅樓」。
陳太與丈夫在380呎的安樂窩把一對子女帶大，「我哋兩夫婦對樓市認識唔多，最初街坊同政府提過『樓換樓』，後嚟無下文。我哋90年代初買入單位，辛辛苦苦舊年夏天先供滿樓，仔女啱啱出身，𠵱家只係賠錢，冇得上樓，佢賠380萬，根本買唔到同區七年樓，我只係希望政府兌現番最初話可以換同區七年樓嘅承諾」。