德能兄癮頭多多，那邊廂才剛卸任評述員協會的主席身份，這邊廂又扯頭纜搞了個體育記者訓練班，為期數周的課程網羅了這版副刊的半數作者吧。不知老編是有心或無意的安排，今年作者團年輕了一截，在我眼中大都是師弟師妹，但在那一班學生心目中，你們又是師兄師姐了。
年輕懂得好好利用的話就是本錢，這群準體育記者，竟然有達50人報名，大概會令業界中人有點驚訝吧，「有乜唔好做呀，做體記？」在與他們見面時，我肯定忍唔住會先問為敬，「因乜咁鍾意呀？」寄望聽回來的答案，又會刺激起我們這班漸漸麻木的圈中人。
新人的朝氣可以溶化老餅，老薑的淳厚反過來又能感染到新一代，前個周末的頒獎禮中全人類重溫學友的醇酒般歌聲，當中聽得最入神又驚訝的，是一班十來二十的年輕人，看見他們瞠目結舌的反應，我們這班過來人惟有講句：「未見過世面呀，我哋個年代巨星個個都係咁㗎啦！」
有些事情3幾年發生一次以為很特別，拉遠點三幾十年來看就知原來小事一樁，又聽鄭子誠數榜，30幾年前的80年代十大金曲，就有很多首都是電視劇主題曲，《輪流轉》到《親情》到《大地恩情》，歌與劇本來就是一套兩件的香港流行模式，這樣拉闊來睇，《天與地》的《年少無知》，又不見得是太石破天驚的大事了。
評述員協會兩年一度換班，今屆上任做幹事的咁蹺也是生力軍少壯派，看來可以為一班同業帶來更多聚頭和消遣的機會，因為基仔、柏翹、Rita、阿凱、Gary、車車、強尼同柏霖，個個玩得，唔好玩咁夜就得嘞，大哥瑜好早瞓㗎。
過去幾年的協會經驗，得出咗一個很有趣的觀察，一大班講波男女之間，原來最大的共同興趣並不是足球，很多時約踢波，都係唔夠人流會，原因可能係食滯咗。可以的話，大家反而想食啲新鮮嘢，譬如打網球、打麻雀甚至打遊戲機，可能仲召集到更多同道。
英國體育界流傳這樣的一句說話：「最差和最好的作者，都在體育版。」信不信由你。
keyman
now TV主持
mailto:[email protected]