「人肉錄音機」林公公瑞麟後繼有人，噚日立法會資訊科技及廣播事務委員會討論免費電視牌照問題，商務及經濟發展局局長蘇錦樑帶住三個標準答案KO兩個幾鐘頭會議，結果會議上不斷聽到「公公」、「狗官」、「無恥」、「無能」，面皮薄啲都坐唔落去。
一號答案：涉及法律程序唔評論。無綫申請「緊」司法覆核，不過𠵱家連審訊日期都未有。二號答案：發牌現由行政長官會同行政會議處理緊，保密原則唔評論。但申請咗三年都仲處理緊，隨時處理一世就保密一世。三號答案：官員只係嚟解釋政策，唔代表行政長官、唔代表行政會議、唔代表前廣管局、唔代表通訊事務管理局。四個唔代表，勁過三個代表。