余詠珊自從加入無綫做綜藝科高層後，對跟佢過檔嘅愛將一直照顧有加，繼黃翠如成功彈出，𠵱家又力捧洪永城（Tony），最近Tony仲闖入戲劇組參演首部劇集《單戀雙城》，合作對手有陳茵媺、陳展鵬、高海寧等。
成班演員噚日喺電視城進行開鏡拜神，Tony透露已經開咗4、5日工，好彩NG唔多，因為有前輩提點。Tony話珊姐有問候佢，佢話﹕「問我拍成點，我話拍得順利。佢冇嚟探班，因為佢係綜藝科，唔會踩過界。」余詠珊會唔會叫戲劇組睇住Tony？佢話：「反而監製成日提點我，睇住我。」
陳茵媺情人節開工
《單》劇4月先去馬來西亞取景，但陳茵媺話未必可以同男友陳豪一齊慶祝情人節，佢話：「要開廠景呀，投入角色後就唔可以提陳豪個名，唔係又會變番陳茵媺。」佢仲好sweet話開心日日係情人節，唔一定要收禮物，暫時亦冇諗過同居。
另外，林夏薇噚日去新城做訪問，問佢知唔知堂兄林峯同吳千語嘅緋聞？佢避忌話大家冇乜聯絡。
撰文：馮仁昭
