近排有人話，𠵱家香港地嘅情況係樓市泡沫，但我覺得呢班人，根本係未見識過乜嘢至係樓市泡沫？
喺1997年前，有些炒家預先放定張冇寫抬頭嘅支票，同埋張簽咗名嘅臨時合約給地產代理，當地產代理通知有筍盤，炒家就連樓都唔睇，即叫代理送票給業主，買樓仲快過街市買餸。
又因為有租務管制，炒家揸貨之後，寧願丟空個單位等升值。就算係放租，租金回報不過是6厘左右，相對當時按揭息口十幾厘，收得租客一萬蚊租，業主都要補多一萬蚊，先至夠錢供樓。炒家係唔志在啲租金。
仲有，當時摩貨充斥，本人試過同一時間揸咗24件摩貨，成交期最短個件都三個月，但我從未打算上會，純係摩來摩去。而本人更瘋狂到投身做埋地產代理，純粹為咗方便買到筍盤，同埋容易出手頭上的貨。
個遊戲中，個市唔單止要升，仲要升得夠快，否則入市的都要輸錢。這種瘋狂，就係泡沬。
𠵱家比起當年97樓市之境況，根本係兩回事。如果有人將𠵱家的情況同97年比較，呢個人一定係唔知97年發生過甚麼事？
網民 uandme
本欄園地公開，歡迎各界來信，以450字為限，請電郵至mailto:[email protected]，註明《家》樓民講場，請留聯絡電話。編輯保留文章的刪減權。