好快就到蛇年，想搵番啲應節嘅利是封，可以去搵公民黨。公民黨余若薇習書法多年，手字見得人，早前佢大筆一揮寫出「銀蛇獻瑞」四個字，化身成10萬個利是封喺全港五區派通街，想擁有或者珍藏嘅真係要快手，如果貪心啲想要余若薇親筆墨寶，聽日就要移玉步去筲箕灣，因為到時佢會同黨友陳家洛落區寫揮春。
講起家洛，八方噚日見佢一個頭痛樣，原來佢細仔道明前排去完波蘭返港後，平時食開嘅奶粉斷貨，落街遍尋不獲，惟有轉食第二隻，點知道明食唔慣，短短一個禮拜就瘦到面仔都凹埋，真陰功，家洛已經四圍撲奶粉，卒之喺金鐘撲到三罐，睇嚟家洛要努力啲啦。高永文局長話可以入媽咪會，屆時獲「配給」就有奶食啦。