去年10月響起鑼鼓的深水埗曉尚，為讓路予恒基同系的元朗尚悅，開了示範單位都臨時煞停，暫停參觀。近日示範單位重開，發展商迅速公佈價單，買實用面積200多呎一房戶，入場費盛惠438.7萬元。項目實用面積平均呎價約1.5萬元，貴同區兩成。
「曉」字頭新盤預咗細，但細到得8呎的平台，真係好搞鬼。說的是項目最細單位：3樓C室，建築面積349方呎，實用245方呎，連平台單位一般都算「特色戶」，但這「條」平台得8呎，細過棺材，跟隔離屋249至734方呎平台比，豈不傷心？唯一好處，是樓上缺德者丟垃圾時，會直接拋出大街，不愁日日掃垃圾。
其餘「特色」
(1)曉尚主打一至兩房，只有頂層唯一的三房作特色戶。分層戶建築面積371至700方呎，實用267至505方呎，不過無論你買大定買細，一律用L形開放式廚房，除非你自整廚門或玻璃隔一隔，否則煮件羊扒都有排「羶」。
(2)間隔四正，空間用到盡，以細單位來講，七成實用兼且室內無厚裝結構牆，算係咁。
(3)特大窗台是例牌，絕大部份窗台都有6呎長，預咗畀買家在窗台造床，唯獨A室的細房有條巨柱阻頭阻勢，令窗台只能造BB床。
(4)一房戶（C及E室）的睡房都有兩道門，形成「套房」，幾搞嘢。其中E室的廁所更必須經由睡房進出。
(5)環境認真麻麻，處於車水馬龍馬路邊，行兩步就是投注站，住開寧靜社區的未必能適應這條「怒火街頭」。
曉尚小資料
地址：深水埗大埔道188號
實用率：71至73%
單位伙數：138伙
層數：28層
間隔：一至三房連套房
分層建築面積：371至700方呎
分層實用面積：267至505方呎
發展商：恒基
示範單位：太子百匯軒