好耐冇蒲頭嘅彭丹，最近獲委任為甘肅省政協，日日戴住唔知有冇鏡片嘅眼鏡去開會，一啲都唔hea，但照樣俾人質疑唔夠班做政協，都係因為佢拍過三級片啫。查實彭丹堪稱奇女子，90年代叱咤娛圈一時㗎！
眾所周知，「波神」彭丹副36F、24、36嘅導彈身材夠煞食，95年《花花公子》雜誌出到25萬美金誘佢拍裸照，但一樣唔心動，呢件事引起黃百鳴注意，邀請佢嚟香港拍《狼吻夜驚魂》，佢嘅唔鹹唔淡廣東話同性感演出，令佢一炮而紅，彭丹亦成為咗性感嘅代名詞。除咗性感，佢仲有必殺技，就係E（一）字馬同埋拱巢（橋）啦！當年頻頻表演，真係好令人懷念！
硬嗰個係你
話說97年4月，彭丹喺林敏驄主持嘅棟篤笑騷度伴舞，點知阿驄口痕叫佢表演拱巢，仲用激將法話：「你係咪硬咗，屈唔到？」彭丹受唔到刺激，就反駁話：「硬嗰個係你唔係我！」之後屈膝跪地，再嚟個向後拗腰180度，咪咪成坐山咁拱起，動作乾淨俐落冇得輸。
彭丹條腰咁掂，照計都係有腰骨之人，佢話要喺甘肅成立影視基地，相信唔係得個講字囉！
撰文：阿Wow