自由黨田北俊做咗兩任旅遊發展局主席，前後一共做咗六年，連同之前周梁做咗幾年，自由黨已經坐咗好多年，一般估計狼英會換人，由高靜芝安插個梁粉入去，不過八方聽聞今次或者破例，狼英未必要旅發局「走唐」，盛傳新主席係唐唐老友麗新集團主席林建岳。
岳少家陣係旅發局董事局成員，董事會出席率相當唔錯，岳少平日多見於娛樂版，皆因佢公司粒粒巨星，劉華、黎明、舒淇、Sammi、千嬅，數極都數唔晒，如果岳少真係做咗旅發局主席，將來就可以同埋巨星一齊推介香港，向全世界講「香港歡迎你」，效果可能好過out晒嘅成龍打功夫。
唔係蛋散梁粉就得
旅發局主席一職，由周梁淑怡喺2000年做起，其後由田少接手，兩人加埋做咗13年，家吓主席一職過戶畀同自由黨「對頭」嘅經民聯監事會主席林建岳，安排都幾詭異，不過八方聽聞田少冇乜意見，因為同岳少都係老友，而且大家都係唐營，總之唔好換件蛋散梁粉入主旅發局就收貨啦。岳少透過發言人表示，至今未接獲做主席消息。
林建岳與唐唐好老友，曾租私人飛機一齊去法國遊酒莊，嘆世界飲紅酒，若然岳少真係掌管旅發局，應該預埋唐唐一份，因為唐唐家陣全職旅遊，幾乎環遊全世界，加上佢識飲識食識享受，知書識禮生活又優游，岳少唔搵佢做旅遊大使，走寶呀！
mailto:[email protected]