商業社會，時刻盤算自己也盤算別人，賭波也是，小弟最鍾意先計值博率，今周英足盃主打，卻後顧下周中英超快車，喜博熱門球迷宜備忘；先取明天荷甲霸主阿積士，客W1.65倍，計值博率唔差得過英足盃列強。
先講英足盃，禮拜日利記、熱刺同車仔3強作客單W互串，隔夜炒埋一碟剛夠2倍，不值推介；今晚，曼城及阿仙奴作客對手皆硬淨，曼城鬥只係近期主場較失色嘅史篤城，雪戰利踢簡單足球下，史篤城受讓莊家精選嘅受讓半/一盤，我會放上貼士框。特擅踢上風波、剛戰亮麗嘅阿仙奴密密打下，要南下到上圈貨真價實淘汰紐記嘅白禮頓，下周中聯賽要鬥利記，呢場忌再熱捧。要穩，還是迎富咸唞夠嘅紅魔，主隊多不會派強陣但[-1]得1.66倍，捧否由你。
向來強弱分明嘅荷甲會易計；阿積士歇冬首戰3球大炒飛燕諾，上力明顯；對手係上半季踢出彩虹嘅維迪斯，但上仗「初出」即走樣作客大敗阿爾克馬爾，今回威力一般嘅主場，冇咗踢非洲盃嘅聯賽射手榜「1哥」韋菲特邦尼真係差好多，連敗難免。兩隊下周四會同地再踢荷蘭盃8強，但相信阿積士唔理得咁多。
講戰意，阿仙奴屆「死亡年齡」29歲嘅右閘沙格拿此刻無限「感觸」，佢禮拜三晚場波，去到下半場大部時間勝負大定仍全無欺場走上走落；可惜有別當紥禾確特，向來最鍾意計靚盤數嘅兵工廠，唔急於同呢位第6季效力嘅老臣傾續約，佢賽後無奈話談論佢喺呢度嘅前途係「困難」。「人比人，比死人」，有機會能盡力去拚便是，呢個世界只有1個32歲仍能以20萬鎊周薪續約嘅左閘艾殊利高爾，想得太多計得太多，徒添煩惱。
文：蘋果波神
(下次見報日期：31/01)