面子在外自然可以為人認識，相反裡子在內，只能默默耕耘……
面子、裡子都是時勢使然，電影內外都是。
張晉以武術冠軍身份，在北京電影圈跑劇組、做替身、以跑龍套身份和蔡少芬結婚，張晉在戲內外、在觀眾眼中都是裡子角色。電影《一代宗師》令他擺脫「蔡少芬老公」包袱，迎來第一次掌聲。同是武行出身的劉家勇，師承洪拳嫡傳的舅父劉家良，在《一》片中演來不慍不火，待遇卻有別。文戲可以武唱，等的只是一個轉身。
撰文：何永寧
現年38歲的張晉即將再為人父，他坦言這是意料之內，但內情不便細表；意料之外的是電影《一代宗師》演的形意拳高手馬三，一個轉身令他成為被激讚的人物。
由電影試鏡到上映，張晉抱着患得患失心情：「王家衛第一日試鏡，問我識打乜嘢拳，我話八卦、形意都識，佢話『咁你去電梯口耍畀我睇啦』。」張晉自言喜歡這種方法，簡單直接，有料冇料沒得吹：「我做武師出身，見過幾多所謂『武術冠軍』俾武指用粗口鬧走。」
做替身等待機會
張晉98年入行，原因是想當演員，既不是演藝學院出身，又沒人事關係，靠的是一身武藝：「喺北京要出鏡就要跑劇組，即係拎住履歷介紹自己畀人，拎畀劇組副導演，希望佢可以用你囉，有時一日要跑4、5個劇組，冇人冇物好少有人肯用你，好在自己武術隊出身，咪惟有做住替身等機會。」
張晉自幼在武術隊打滾，身邊都是單純的運動員，不懂鑽門路，在五花八門的影圈，打滾了兩年才在電視角色中有第一句對白，他說：「我記得嗰句係『是，大哥』，到03年拍《靈鏡傳奇》先叫做有多啲對白，當時我識到蔡少芬。」
自08年娶了蔡少芬後，張晉便多了一個「蔡少芬老公張晉」名銜，好像出嫁的是自己，他說：「香港人識我係因為娶咗個香港老婆，呢個係事實我會接受，冇話唔開心。試過有套內地電視劇打完我個名之後，仲要括住寫（蔡少芬老公）做註解，我話你哋咁識宣傳嘅！唔係咁可以點？接受就冇嘢。其實結婚之前都預咗，不過有時情緒低落都會諗，我咁認真做嘢，點解啲人見唔到我嘅努力。」
文戲受讚感滿足
張晉明白娛樂圈跟紅頂白，做了5年蔡少芬背後的男人，在王家衛的電影《一代宗師》卒之等到一個轉身機會，功夫派上用場，戲中張晉成功將充滿機心的馬三內心戲釋放出來：「第一日開工，導演見到我話『三爺早晨』，王家衛識得點樣幫演員入戲代入角色。拍呢套戲最大滿足感係最尾一場文戲，我打輸畀子怡之後要一鏡過講一串對白，前後拍咗三個take，到最後一次導演收貨仲同全場工作人員一齊拍手掌，嗰一刻我好感動，覺得自己係一個演員，當時諗出到嚟剪剩幾多戲份都已經唔重要，乜都已經值。」
宮家的馬三深入民心，張晉早前到北京宣傳，出場時自我介紹時，情況可見一斑，他說：「出台時我話『大家好，我係張晉』，台下冇反應，跟住我話『我是演馬三的張晉』，台下即時反應熱烈到不得了，係拍呢套戲第二次令我感動，我諗呢啲就係角色嘅魅力。」一下轉身變成獨當一面的面子，張晉渴望成為真正演員。自電影《臥虎藏龍》跟八爺（袁和平）學做武指，同時替戲中的章子怡及楊紫瓊擔任替身後，他從沒有放棄成為一位武指的理想，他說：「唔敢講傳承八爺，不過好想喺佢身上學到嘅，用番喺電影上。」