彭羚拖女行街似兩姊妹

【銅鑼灣】彭羚自從嫁畀林海峰（Jan）之後就專心相夫教女，經常見佢湊女返學放學。好似前日下晝咁，又見佢孖住大女林泳出巡。前日下晝3點左右，彭羚戴住副黑超同大女出現喺銅鑼灣利園商場，當時佢喺顧客服務部蓋車票。同林海峰成個餅印嘅林泳，雖然下個月情人節先至14歲，但佢已經生得好高大，事關前日彭羚着咗對3吋幾嘅短靴，林泳就着平底鞋，兩母女拍埋一齊嘅時候，彭羚只係高大女少少，即實際上林泳已經高過媽咪。

【今日我至甜】廿四孝媽咪彭羚前日帶大女林泳返銅鑼灣補習社上堂，彭姑唔係蹺住個女就係同囡囡拖晒手，兩母女真係甜到痹。

帶女返補習社

林泳等緊媽咪蓋車票嗰陣，仲搭住媽咪膊頭，兩母女十足十似兩姊妹咁。蓋完車票後，彭羚蹺住林泳行咗去隔籬希慎道一大廈，記者見水牌有間補習社，深信彭羚係帶個女去上堂。不過，彭羚唔單止帶女返補習社，而且仲陪埋上堂㖭，真係廿四孝媽咪。彭羚同大女喺補習社逗留到4點幾至離開，之後兩母女就行返去利園停車場攞車走人。
採訪、攝影：吳耀輝

臨入𨋢去停車場嗰陣，林泳忽然手指指，好似有大發現咁。

彭羚邊行邊同林泳講笑，仲笑到掩住個嘴。

蓋車票嗰陣林泳（右）搭住彭羚膊頭，兩母女好老友。