像很多想買樓的年輕人一樣，藝人張美妮曾經將目標定得太高，「09年想買樓，走去睇葡萄園（元朗）！結果梗係買唔起啦。」樓沒買成，改為投資在髮型屋上，暫時成績不錯。尚未有樓揸手的她仍在靜候時機，「細細哋買間沙田第一城就得。」
記者：葉淑貞
攝影：黃永俊
張美妮說，在25歲之前，她一直覺得買樓是男人的責任，「阿媽成日提我儲錢買樓，做父母的都想女兒有個人資產，買樓就像入錢落個大錢箱。」人漸漸成長，開始體會父母一片苦心，「冇理由靠晒男人，若然女人有資產，即使丈夫一時失意，自己都幫到手。」
09年是買樓好時機，儲了點錢的她去葡萄園睇樓，「目標錯晒！我喜歡熱鬧大家庭，夢想有間足以容納父母、小朋友、工人的單位，以為買樓就是要買間自己最鍾意的，沒想過大部份人都是一步步換樓。後來知道楊思琦都買幾個舊樓單位收租，自己諗諗吓，係喎，呢個方法都幾好。這些循序漸進的理財方法，要成長了先至識。」
過往主持《更上一層樓》，至豪至靚的屋仔都見過，「哇，好靚呀！不過（夢想）太遙遠了。」
張美妮如今的目標一下子「倒退」至沙田第一城，想買間作長線收租，「父母都住沙田區，而且第一城很好租，有很多年輕夫婦客源。不過我對這屋苑有點認識，以前見過細單位只賣幾十萬，如今升到這個價位（起碼賣三百幾萬），好難接受呀！」
不過，疑似男友的髮型屋老闆KK，聽到買第一城收租就一臉不以為然，想也不想就否決了，「我唔贊成！𠵱家收租只得兩厘，我做生意的回報是廿幾厘。買樓無疑有機會賺價，但生意才是長遠的。」美妮一聽，只得傻笑。
創業想成功 必先沉迷專注
雖說投資髮型屋，但張美妮只是掛個名，真正揸弗人是創立Sigo Hair Salon的KK。拍攝時，頭髮掂唔掂、口紅有冇太over……所有細節，張美妮都要問過KK至安樂。
由十幾歲做「洗頭仔」起家，現有六間連鎖店，馬鞍山、荃灣、將軍澳各兩間，全屬新興屋苑商場。KK擁有一派年輕生意人的自信自然，非常健談，他在馬鞍山創辦的大本營，至今已開業十多年。白手興家的竅門，在於沉迷，「就好似藝術家會忘記睡覺、忘記吃飯，把全副精神創作。想在哪一方面成功，就要沉迷下去，做生意正是如此，全副心思去做，另外要培養社會觸角。」
不過他說現今創業難度高，「以前的環境容許你失敗一次，但𠵱家唔得，輸一次已好難翻身。甚麼都給大財團包辦，連食餐日本菜都要光顧財團！」
父母前車可鑑 深知飲食業辛苦
藝人投資，每多進軍飲食業，但大部份風風光光的開，又悄悄關門，鮮有持久經營。曾傍住梁文韜主持飲食節目、獲封「女食神」的張美妮，父母過往正是經營食肆。店子位於佐敦，但位處橫街兼要上樓，經營十年後，在03年沙士一役，難抵經濟寒冬而結業。
「我都諗過投資食肆，但沒遇到合適的拍檔。屋企人做過食肆，反而令我不太想做，飲食業真的好辛苦，眼見父母由朝企到晚，飯市時衝鋒陷陣，大時大節也不能陪伴孩子，聖誕節得我和細妹兩個食大餐。」
她說，身邊不少朋友都想創業，但成功例子不多，「有些朋友只有十多萬本金就創業，時間稍長就守不下去；亦有些人缺乏耐性，見成果不如想像，就不願繼續投資及守業，本金燒光就結束了，我覺得做生意起碼該有充足預算去守兩年。」
張美妮小檔案
張美妮（Meini）為TVB藝人，99年參加第13期無綫電視藝員訓練班入行，主要從事主持工作，初期做兒童節目，如《閃電傳真機》及《至NET小人類》，及後有資訊節目《娛樂大搜查》、《東張西望》等，最深入民心為主持《日日有食神》，被封「女食神」。
