港股高位震住派貨，唔少早排齋炒概念、未見實質盈利支持的股份都回得好急。近日唔少戰友於facebook留言，表示入貨後坐艇，現在應該沽還是留？個人認為首注應先買三分之一，走勢突破後再加碼，這樣心理壓力會低一啲，止蝕都冇咁肉赤。
近日推介的嘉瑞國際（822）及惠理集團（806）先後發盈喜，有利集團（406）昨日再獲47億元公屋合約，3股後市可睇高一線。市況震盪，揀股難度相當高，齋睇圖並不足夠，要勤力計吓數先得。魏力認為敏華控股（1999）是潛在「盈喜股」之一，值得買定等派彩。
敏華主攻休閒沙發產銷，截至9月底止上半年，純利2.19億元，按年增長54%；毛利率35.7%，增加1.1個百分點。美國市場佔其銷售55%，中國及歐洲分別佔25%及9%。美國新屋動工創4年半新高，外銷佔近七成的敏華自然受惠。集團去年7月起加價2%至5%，下半年毛利率料更高。內地十一黃金周銷售已達1.75億元，按年升23%，長遠是城鎮化受惠股之一。如下半年純利較上半年再升20%，全年將賺4.79億元，按年增長58%，盈喜在望。
現價敏華預測PE僅13倍，以龍頭股計仍吸引，短線目標睇8蚊，仍較2011年高位低43%。
魏力
http://www.facebook.com/2012jason