今年首度打入《福布斯》香港富豪榜第25位嘅大鴻輝主席梁紹鴻，首間投資發展嘅酒店噚日舉行開幕禮，除咗政務司司長林鄭月娥、東亞銀行（023）主席李國寶外，幾位身家億億聲嘅地產投資老手都畀面出席，仲唔介意危險企出馬路，甚至企得老遠喺酒店對面馬路遙距撐場，可見梁主席人緣幾好，同CY差得遠。
與街坊同曬太陽
大鴻輝喺灣仔嘅港島英迪格酒店（Hotel Indigo）噚日中午舉行開幕禮，現場嘉賓、記者加埋途人起碼四、五百人，好多嘉賓唔想逼喺酒店範圍，寧願企街。
特首辦主任邱騰華個細佬、帝邦發展執董邱騰達，咪就係企喺酒店外面行人路囉。小巴大王馬亞木索性走過對面馬路，同班街坊曬住太陽睇開幕，街坊們應該未必知道身旁有幾位富豪，真係這麼近，又那麼遠。
想知間酒店掂唔掂，就要等4月正式開張時先體驗到喇。