關心妍早排喺港台搞嘅十大中文金曲頒獎禮食白果，事後佢宣佈完成手頭上嘅工作之後就會退出，專心做楊太同埋造B。前晚佢去將軍澳電視廣播城為無綫《勁歌金曲》錄影，佢解釋話會完成晒手頭上工作後就全力養好身體做人。
前晚佢喺現場演繹冠軍歌《白費》，馮仁昭睇個歌名就覺得好應景，連關心妍都自嘲話：「都好應景，唔係刻意，歌詞幾貼切，唱嗰時感受幾深，今次都應該係最後一次上《勁歌》，之後都唔會plug歌，除非轉咗形式。」佢自爆老公對佢退出好開心，亦感激公司老闆支持佢嘅決定。對於楊千嬅都撐話生仔要緊，關心妍話好多謝千嬅嘅鼓勵，仲再次重申唔參加頒獎禮唔代表唔再做音樂，只係唔做宣傳。
增肥8磅生蛇B
關心妍話𠵱家當務之急係要努力增肥，醫生話佢冇脂肪，最起碼增8磅先可生B，佢好希望趕得切生蛇B，因為老爺都係蛇年，所以想屋企有兩條蛇，佢話：「已經睇咗好多醫生，好多人介紹，乜都睇，但求快，所以好鬼忙，醫生話33歲未需要人工受孕住，始終有風險，有朋友試過差啲命都冇。」
此外，同場嘅王菀之就否認拍劇換獎，仲自爆原本監製唔想搵佢，係王祖藍再三推薦，監製欣賞過佢舞台劇先搵佢拍攝，佢仲話𠵱家未有人叫我還債，而且佢唔係好有興趣拍劇，仲話講拍劇會大牌啲，要睇吓乜人腳先拍。
撰文：馮仁昭
