最近行金舖，蛇仔造形金器實放喺當眼處，雖然十二生肖當中，蛇嘅造型冇其他生肖咁得意，但聽周大福董事總經理黃紹基講，好多客人鍾意儲十二生肖擺件，唔理今年屬乜年生肖都會照買。除咗當年生肖嘅金器有銷路，每年總會有幾個生肖嘅金器特別好賣，主要係犯太歲人士買來趨吉避凶，至於邊隻動物最多人買，就要視乎風水師點講。
基哥話，每年由年廿七開始，就會有好多客人開始走去買用來化解犯太歲嘅生肖飾物，每次只要蘇民峰、麥玲玲師傅喺電視節目講完，第二日就會有客人走去掃貨。由於每位師傅嘅講法都唔同，所以好難貼中邊個生肖最多人買，佢哋唯有搵人聽實師傅點講，盡量預備，當然未必次次預得準。今年猴、雞、牛、鼠形飾物都適合犯太歲人士佩帶，有可能會跑出啩。